TANZANIA: Dar Salaam Abaturajye ntibemerewe kujya nyuma ya sas kumi nebyiri z'umugoroba kubera y’imyigaragambyo yabaye ku munsi w’amatora

Amakuru yatanzwe n’abakozi bo ku bitaro bya Muhimbili i Dar es Salaam aavuga ko babonye umubare munini w’abantu bakomeretse, mu gihe Abanya-Tanzania bari mu matora ya Perezida n’abadepite.

Aya matora ategerejweho gutsindira byoroshye Perezida Samia Suluhu Hassan n’ishyaka rye riri ku butegetsi, kuko umuyobozi w’ishyaka rikomeye ry’abatavuga rumwe n’ubutegetsi afunze azira ibyaha bya “guhungabanya igihugu” (abyamaganira kure), kandi ishyaka rye ryirinze kwitabira amatora.

Abigaragambya basaba ko haba impinduka mu mitegurire y’amatora no kugira ubwisanzure bwa politiki, batwitse imodoka ndetse bangiza ibikorwa remezo bya leta.

Umuyobozi mukuru wa polisi, Camelius Wambura, yatangaje ko gukumirwa kujya hanze gutangira saa kumi n’ebyiri z’umugoroba, asaba abaturage kuguma mu rugo, ariko ntiyatangaje igihe bizakurwaho.

Komiseri w’Intara ya Dar es Salaam, Alfred Chalamila, yari yabanje kuburira ko leta izafata ingamba zikomeye ku bantu bose bahungabanya ituze ry’umujyi.

Imyigaragambyo nk’iyo yanabaye mu mujyi wa Mbeya mu majyepfo y’uburengerazuba no mu mujyi wa Tunduma ku mupaka.

Umwe mu bigaragambya yatangarije ikinyamakuru cya BBC ati: “Turarambiwe… Turifuza komisiyo y’amatora yigenga kugira ngo buri Munya-Tanzania ahitemo umuyobozi ashaka.”

Uretse imvururu mu mihanda, interineti mu gihugu hose yahuye n’ikibazo gikomeye. Urwego mpuzamahanga rukurikirana imikoreshereze ya interineti, NetBlocks, rwavuze ko ari “habayeho guhagarikwa kwa internet mu gihugu hose”.

Amakuru avuga ko abatora bari bake cyane i Dar es Salaam ubwo amatora yatangiraga ku wa Gatatu, kuko benshi batinyaga kuza kubera impungenge z’umutekano.

Umuvugizi wa polisi yari yatangaje mbere ko nta mpungenge z’umutekano zihari, avuga ko “abantu bakwiye kuza gutora”, nk’uko byatangajwe ku mbuga nkoranyambaga.

Abanyatanzania barenga miliyoni 37 nibo bemerewe gutora Perezida n’abadepite.

Hari amashyaka 16 mato yemerewe guhatana na Perezida Samia, ariko nta na rimwe rifite ububasha bukomeye muri rubanda.

Umukandida rukumbi ufite amahirwe menshi, Luhaga Mpina wo mu ishyaka ACT-Wazalendo, yakuwe ku rutonde kubera impamvu z’amategeko.

Perezida Samia Suluhu Hassan

Perezida Samia ategerejweho gutsinda amatora.

Ishyaka rye riri ku butegetsi, CCM, ni ryo ryagiye ryegukana amatora kuva igihugu cyabona ubwigenge.

Mbere y’amatora, amashyirahamwe arengera uburenganzira bwa muntu yakunze kunenga ubutegetsi, aho Amnesty International yavuze ko hari “ubwoba n’iterabwoba” birimo gufata ku ngufu, kunyerezwa no kwicwa ku buryo budakurikije amategeko byakorewe abayoboke b’amashyaka atavuga rumwe na leta.

Leta yamaganye ayo makuru, ivuga ko amatora azaba mu bwisanzure n’ubutabera.

Perezida Samia Suluhu Hassan yabaye Perezida wa mbere w’umugore wa Tanzania mu 2021, asimbuye nyakwigendera John Magufuli.

Mu ntangiriro y’ubutegetsi bwe, yashimwe kubera kugabanya ibihe by’igitugu bya politiki byari byaratejwe na Magufuli, ariko uko igihe cyagiye gihita, ubwisanzure bwa politiki bwarafunzwe, aho ubutegetsi bwe bushinjwa gufata no gufunga abavuga ukuri n’abatavuga rumwe n’ubutegetsi.

Komisiyo y’amatora iteganyijwe gutangaza ibyavuye mu matora mu minsi itatu nyuma yo gusoza gutora.