DR Congo: Minisitiri w'ubutabera yitabye ubushinjacyaha akekwaho kunyereza imari yo kubaka gereza
Minisitiri w'ubutabera wa DR Congo ku wa kabiri yitabye ubushinjacyaha i Kinshasa burimo kumukoraho iperereza ku cyaha cyo kunyereza umutungo wa leta wari ugenewe kubaka gereza.
Constant Mutamba n'abantu benshi bamushyigikiye babonetse ku biro by'umushinjacyaha mbere y'uko yinjira ngo yitabe aherekejwe n'abunganizi mu mategeko, nk'uko bivugwa n'ibinyamakuru muri DR Congo.
Mbere, Mutamba yari yaravuze ko atazigera yitaba uyu mushinjacyaha avuga ko uwo mushinjacyaha na we ubwe hari ibyaha akekwaho.
Iyi ni imwe muri dosiye yagarutsweho cyane muri iyi minsi muri Repubulika ya Demokarasi ya Congo, ahanini kuko mu gihe gishize uyu minisitiri w'ubutabera yavuze ko umuntu uzajya ahamwa no kunyereza umutungo wa leta yajya akatirwa urwo gupfa.
Mutamba yagiye ahakana ibi birego akekwaho.
Amashusho yashyizwe ku mbuga nkoranyambaga yerekana abantu benshi barimo abo ibinyamakuru bivuga ko ari abakora mu biro bya Mutamba, hamwe n'abamushyigikiye, bamuherekeje ku biro by'umushinjacyaha bavuza amafirimbi kandi baririmba ko ari umwere.
Mutamba akekwaho kunyereza kuri miliyoni 39$ zari zigenewe kubaka gereza nshya ya Kisangani, ashinjwa gutegeka kwishyura amafaranga y'ibanze angana na miliyoni 19$ muri iryo soko ryo kubaka gereza mbere y'uko ryemezwa n'urwego rubishinzwe.
Mu cyumweru gishize Inteko Ishingamategeko ya DR Congo yatoye ku bwiganze ko Minisitiri Mutamba akurikiranwa n'ubushinjacyaha kuri ibi byaha akekwaho.
Ni nyuma y'uko Mutamba yari yavuze ko atazigera yitaba Umushinjacyaha wari wamutumije ngo atangire iperereza kuri we.
Ubwo yari asohotse mu biro by'umushinjacyaha ku wa kabiri, Constant Mutamba yahisemo kutagira icyo abwira abanyamakuru, nk'uko ibiro ntaramakuru bya Congo, ACP bibivuga.
Iki ni kimwe mu birego birimo kugarukwaho n'abantu benshi muri DR Congo, bamwe banenga uburyo abategetsi b'iki gihugu bakomeje kuvugwa mu bikorwa byo kunyereza umutungo w'igihugu, abandi bashima ko kubakurikirana kugeza kuri minisitiri w'ubutabera ari ikimenyetso cya demokarasi no kubahiriza amategeko.
